ПАДАРОЖЖА ПА ЭТНАГРАФІІ
16 жніўня выхаванцы прышкольнага аздараўленчага лагера ”Сонейка“ ДУА ”Яноўская яслі-сад - базавая школа імя М.Л.Цурана Сенненскага раёна“ у тэматычны дзень ”Свет краязнаўства“ наведалі гісторыка-краязнаўчы куток ”Беларуская хатка“, які створаны на базе ўстановы адукацыі.
Тут можна было пакруціць кола калаўрота, палюбавацца прыгожымі ручнікамі, падзорнікамі, сурвэткамі, патрымаць у руках верацяно, вілкі, чапялу, стрыгач ці серп, узважыць рэчы з дапамогай бязмена, зачарпнуць апалонікам у чыгун, запаліць старажытны ліхтар, прасеяць муку праз рэшата і замясіць цеста ў дзежцы, даведацца аб прызначэнні ступы, бойкі, праса, каромысла, праніка і качалак, паспрабаваць пакачаць ільняны ручнік, агледзець сялянскі гардэроб.
Выхаванцы пазнаёміліся са звычаямі дэкаратыўнага аздаблення беларускай хаты, традыцыйным інтэр’ерам сялянскай хаты, пазнаёміліся з духоўнай спадчынай роднай зямлі, абрадамі і святамі беларусаў, пашырылі свае веды па беларускай этнаграфіі. |